Претседателот на ССМ, Слободан Трендафилов, денеска изјави дека егото на владини претставници го блокира зголемувањето на платите на работниците. Тој додава дека минатата година работодавачите биле подготвени да ги зголемат платите на работниците за најмалку 6.000 денари, доколку Владата привремено се откажеше од придонесите. Сепак, поединци во Владата одбиле да дозволат такво олеснување, веројатно со цел да ја претстават Владата како институција која води најсиромашни работници и најсиромашна држава во Европа.
„Доколку минатата година не тераа инат, денеска работниците ќе имаа за 6.000 денари повисоки плати, а буџетот ќе добиеше дополнителни над 10 милиони евра месечно, односно над 120 милиони евра годишно. Наместо тоа, Владата продолжува со задолжување кое ќе ги плаќаат следните генерации“, изјави Трендафилов.
Тој апелираше до бизнис секторот да ја прифати „подадената рака“ кон работниците и да ја принуди Владата да застане на страната на вработените и деловниот сектор. Во спротивно, Трендафилов предупреди дека ССМ ќе премине на следните фази на притисок – блокади, протести и Генерален штрајк, а последиците и одговорноста ќе бидат на владиниот сектор.
