Силна бура предизвика сериозна сообраќајна несреќа на Крчкиот мост во Хрватска, откако камп-приколка се преврте и остана да виси на заштитната ограда, поради што мостот беше затворен за сите возила.
Несреќата се случила околу 14:30 часот, кога возач на комбе со приколка ја игнорирал забраната за движење која важела за одредени категории возила, меѓу кои и возила со приколки. Во моментот на преминување, бурата дувала со брзина поголема од 140 километри на час, што довело до превртување на приколката.
Засега нема информации за повредени лица, но отстранувањето на приколката ќе биде сложена операција, при што се очекува ангажман на спасувачките служби во ризични услови. Поради инцидентот, блокираните сообраќајни ленти и силниот ветер, мостот повторно бил затворен околу 15 часот.
Ова не е единствениот случај на неодговорно однесување во текот на денот во Хрватска. Претходно, непознат возач на патничко возило ја искористил можноста да помине зад противпожарно возило, и покрај тоа што налетите на ветер достигнувале и до 180 километри на час.
Од противпожарната служба во Крк информираа дека ваквото однесување сериозно ја загрозува безбедноста, како на возачите, така и на службите кои интервенираат во екстремни услови. Сепак, во тој случај не биле пријавени последици.
