ВМРО-ДПМНЕ оцени дека протестот на Сојузот на синдикати, за кој тврдат дека бил организиран и логистички поддржан од СДСМ, доживеал „целосно фијаско“ и претставувал политичка манипулација.
Од партијата велат дека протестот не бил автентичен синдикален израз, туку, како што наведуваат, „лошо режирана партиска претстава“.
„Синдикалниот протест се покажа како партиска претстава на СДС, во која ССМ послужи како параван за обидите на СДС да се врати на политичката сцена. Наместо вистински работници, присутни биле партиски активисти кои глумеа синдикалци“, соопштија од ВМРО-ДПМНЕ.
Од таму додаваат дека граѓаните ги препознале, како што велат, „манипулациите“ и не дале поддршка на протестот.
„Граѓаните јасно ја препознаа политичката злоупотреба и испратија порака дека вакви сценарија повеќе не поминуваат“, се наведува во реакцијата.
ВМРО-ДПМНЕ обвинува дека ССМ наместо да ги штити работничките права, се ставил во функција на партиски интереси, оценувајќи дека станува збор за „политичка злоупотреба на работниците“.
Од партијата порачаа дека, како што велат, ќе продолжат со политики насочени кон зголемување на платите и подобрување на животниот стандард.
