Интерактивна мапа за западнонилската треска: Прикажани се случаите, ризичните точки и прскањата

Сите достапни информации за западнонилската треска, регистрираните случаи, ризичните точки и активностите за сузбивање на комарците отсега се обединети на една интерактивна мапа, информира министерот за здравство Сашо Клековски.

Новата страница е подготвена од Министерството за здравство и Институтот за јавно здравје со цел јавноста да има навремен и транспарентен пристап до податоците за состојбата.

— реклама —

Клековски појасни дека интерактивната мапа ги интегрира податоците од Министерството за здравство, Институтот за јавно здравје, Центарот за јавно здравје Скопје и Клиниката за инфективни болести. Мапата е изработена со поддршка од ГИС ДАТ, односно ГДИ, преку нивниот придонес како општествено одговорна компанија.

На мапата се прикажани сите регистрирани случаи на западнонилска треска, распоредени според населените места, како и нивната локација. Дополнително, се означени и ризичните точки утврдени во координација со Центарот за јавно здравје, меѓу кои и местата со присуство на легла на комарци.

— реклама —

Посебен дел е посветен на мерките што се преземени и што се спроведуваат во Скопје и скопскиот регион за сузбивање на комарците.

— реклама —

„Дадени се сите активности што се спроведени или се спроведуваат во градот Скопје, односно во скопскиот регион, за прскање, со податоци за тоа каков е типот на прскање, со што е прскано, кој прскал и кога е прскано“, посочи Клековски.

На страницата е наведено и времето на последното ажурирање на податоците, со што, според министерот, треба да се избегне забуна поради користење податоци од различни временски периоди.

Целта на новата платформа е на едно место да се обезбеди целосен и прегледен увид во епидемиолошката состојба, ризичните подрачја и активностите што ги преземаат надлежните институции во справувањето со западнонилската треска.

Линк до мапата: http://www.healthalert.mk/