Компанијата „Трим и Лум“ се огласи по пожарот што избувна во Кисела Вода, во близина на нивен градежен објект, посочувајќи дека засегнатите кабли и електро-ормари не биле дел од внатрешната инсталација на објектот.
Од компанијата велат дека станува збор за инфраструктура од дистрибутивната мрежа која не е изведена, одржувана ниту управувана од нивна страна.
„Нашите инсталации на објектот се изведени согласно проектна документација, со сите потребни атести и дозволи и не беа извор на инцидентот“, наведуваат од „Трим и Лум“.
Компанијата додава дека изјавите во дел од медиумите според кои пожарот настанал „од непознати причини“ на надворешна изолација не ја прикажуваат целосната фактичка состојба.
Поради тоа, бараат независна и целосна техничка истрага од надлежните институции која треба прецизно да утврди како дошло до напојување на каблите што го предизвикале пожарот.
„Трим и Лум ќе ѝ ги стави на располагање на истрагата сите технички документи, мерења и снимки со кои располага“, посочуваат од компанијата.
Во соопштението нагласуваат дека најважно е што во инцидентот нема повредени лица.
„Безбедноста на станарите и на нашите соседи е и останува наш апсолутен приоритет. Продолжуваме коректно да соработуваме со сите институции и партнери, вклучително и со ЕВН, до целосно расчистување на случајот“, стои во реакцијата на „Трим и Лум“.
