Кога ќе биде готов патот на Теферич? Мицкоски и градоначалничката најавуваат брза санација

Санацијата на оштетениот пат кон Теферич во скопската општина Кисела Вода треба да заврши за неколку месеци, доколку дозволат временските услови, најави премиерот Христијан Мицкоски, одговарајќи на новинарско прашање за состојбата на сообраќајницата која подолг период претставува проблем за жителите.

„Тоа навистина е добро прашање. Се работи, еве, тоа го зборувавме и со градоначалничката, можеме да појдеме таму да видите како се работи, се копа, интензивно се работи“, изјави Мицкоски.

— реклама —

Тој потврди дека проектот го финансира Министерството за транспорт и ја праша градоначалничката на Кисела Вода, Бети Стаменкоска-Трајкоска, кога се очекува завршување на работите.

„Верувам дека набрзо“, одговори градоначалничката.

„За некој месец од денеска, ако нè послужат, се разбира, временските услови, ќе можеме таму да одиме“, додаде Мицкоски.

— реклама —

Патот кон Теферич е проблематичен подолг период поради сериозно свлечиште кое предизвика пукање и пропаѓање на коловозот. Во февруари годинава, по дополнителни оштетувања и стручни проценки, беше донесена одлука патниот правец да се затвори за сообраќај од безбедносни причини.

Оштетувањето се појави и покрај претходните интервенции на оваа делница, што дополнително го отвори прашањето за потребата од трајно решение за нестабилниот терен.

— реклама —

Во јули, министерот за транспорт Александар Николоски соопшти дека Владата одлучила Министерството целосно да го преземе проектот за стабилизација и санација, бидејќи станува збор за сложено свлечиште чие решавање ги надминува финансиските и техничките можности на Општина Кисела Вода и Град Скопје.

Тогаш Николоски најави дека санацијата би можела да заврши пред почетокот на зимата, по спроведувањето на постапката за избор на изведувач.

Меѓутоа, во август министерот посочи дека проблемот е посложен и дека очекува свлечиштето да биде санирано во рок од една година.

— реклама —

Во меѓувреме започнаа градежни активности на оштетената делница, а со денешната изјава Мицкоски најавува дека работите би можеле да завршат за неколку месеци, зависно од временските услови.

Засега не е соопштен конкретен датум за завршување на санацијата и повторно воспоставување на сообраќајот по овој патен правец.