Драма со викање, станување од место, покажување со прст и меѓусебни обвинувања за закани и насилство се случи на седница на Советот на Општина Кисела Вода. Тензијата кулминираше кога претседателката на Советот, Светлана Колариќ, побара обезбедување и отстранување на советникот од Левица, Петар Здравевски.
Кавгата започна додека Колариќ прашуваше дали некој друг бара збор, по што Здравевски ѝ возврати: „Вие не барате?“.
Во расправијата потоа се вклучи и градоначалничката на Кисела Вода, Бети Стаменкоска Трајкоска.
„Сега пак ќе продолжуваш да се закануваш? Затоа што следното ниво на тебе ти е закана“, му рече таа на советникот.
„Не се заканувам“, возврати Здравевски.
Во салата почнаа да се слушаат повишени тонови од повеќе присутни, а градоначалничката продолжи со обвинувањата кон советникот.
„Ти реченицата треба да ја слушаш од почеток до крај, а не да се закануваш по деца“, рече Стаменкоска Трајкоска.
Здравевски категорично го негираше тоа.
„Не ја манипулирај јавноста, не сум ти се заканувал!“, возврати тој.
Градоначалничката, покажувајќи со прст, му одговори: „Мавтање со прст, не е ова закана! Ете го твојот говор на тело. Сто отсто сум сериозна, имам сведоци за тоа“.
„Напијте се вода, смирете се, многу сте црвена“, ѝ рече Здравевски, по што Колариќ неколкупати го повика по име во обид да ја смири ситуацијата.
Расправијата дополнително ескалираше кога советникот го отвори прашањето за неговото семејство.
„Дај кажи нешто за децата, за пренатрупаноста, не татко ми да ми го спомнуваш“, рече Здравевски.
„Ајде не глуми лудило, кој го спомна татко ти? Ма кој спомна татко?“, возврати Колариќ.
Во тој момент Здравевски, праша: „Минатата седница, кој спомена татко?“, по што стана од место и се упати кон местото каде седи претседателката на Советот.
Тогаш Колариќ побара обезбедување.
„Јас барам обезбедување, ми се заканува. Барам обезбедување и Петар да излезе надвор“, рече таа со повишен тон.
Од своето место стана и градоначалничката, како и уште едно лице, додека расправијата продолжи. Здравевски возврати: „Не глуми лудило“ и седна на место.
Кога од салата беше посочено дека случувањата ќе бидат снимени од камерата, Колариќ одговори: „Нека сними, лудак!“.
По инцидентот, претседателката на Советот побара за идните седници да има обезбедување.
„Градоначалник, ќе ве замолам за следната седница да повикуваме обезбедување. Ако нема Општината, ќе донесеме и одлука. Навистина не може да функционира Советот со насилници“, рече Колариќ.
„Каков насилник, дај не ме обвинувај, ало“, возврати Здравевски.
И покрај жестоката расправија, седницата продолжи, а кавгата меѓу присутните не запре ниту додека Советот гласаше за одлука.
