Податочните центри што ја поддржуваат вештачката интелигенција станаа нова цел во конфликтот меѓу Иран и САД, отворајќи ново поглавје во современото војување, во кое покрај енергетската инфраструктура, на удар се најде и дигиталната инфраструктура.
Според анализата на CNN, Иран извршил напади врз неколку податочни центри во земјите од Персискиот Залив, додека САД возвратиле со напад врз ирански центар. Досега ваквите објекти најчесто беа мета на кибернапади, но 2026 година донесе и директни физички напади врз нив.
Меѓу погодените објекти е и центар на Amazon во Бахреин, кој, според иранските власти, обезбедува услуги за американските воени и разузнавачки структури. По нападите, Amazon Web Services пријави прекини во работењето во регионот, а сателитските снимки покажале значителни оштетувања.
Иранската Револуционерна гарда претходно објави список со 29 технолошки цели во регионот, меѓу кои се објекти поврзани со Amazon, Google, Microsoft, Nvidia и Palantir.
Во изминатите години, земјите од Персискиот Залив инвестираа огромни средства за да станат глобален центар за развој на вештачката интелигенција. Саудиска Арабија, Обединетите Арапски Емирати, Катар, Кувајт, Бахреин и Оман најавија инвестиции вредни повеќе од два билиона долари во соработка со САД, со цел регионот да стане трет светски центар за вештачка интелигенција, покрај САД и Кина.
Експертите предупредуваат дека ваквите напади ја намалуваат довербата кај инвеститорите и ја зголемуваат неизвесноста околу безбедноста на инфраструктурата. Дополнителен проблем претставува и фактот што многу од овие центри имаат двојна намена – служат и за комерцијални услуги и за потребите на државните институции и војската.
Поради новите закани, осигурувањето на податочните центри станува сè поскапо, а дел од осигурителните компании веќе одбиваат да преземат ризик. Аналитичарите оценуваат дека технолошките компании во иднина ќе мора внимателно да ги избираат локациите за изградба на нови центри, бидејќи тие сè почесто се сметаат за стратешки цели во современите конфликти.
