Иран: Ги прекинуваме сите комуникации со САД и целосно го блокираме Ормутскиот теснец

Иранскиот преговарачки тим ја прекинува размената на пораки со САД преку посредници поради израелските напади во Либан, објави полуофицијалната иранска новинска агенција Тасним.

Според агенцијата, Техеран донел одлука да ги суспендира сите индиректни контакти и преговори со Вашингтон, оценувајќи дека актуелното примирје е прекршено поради израелската офанзива во Либан.

— реклама —

Од иранска страна сметаат дека ситуацијата во Либан била клучен дел од договорот за прекин на огнот и дека тој повеќе не се почитува.

— реклама —

„Нема да има никаков дијалог“ сè додека не бидат земени предвид ставовите на Иран и Хезболах, наведува Тасним, додавајќи дека иранските власти бараат запирање на израелските воени операции и целосно повлекување од окупираните територии.

Во меѓувреме, Иран соопшти дека целосно го блокирал Ормутскиот теснец, еден од најважните светски поморски коридори за транспорт на нафта и гас. Претходно Техеран тврдеше дека дозволува ограничен премин на одредени бродови под строго утврдени ирански услови.

— реклама —

Тасним наведува и дека теснецот Баб ел Мандеб, кој ги поврзува Црвеното Море, Аденскиот Залив и Индискиот Океан, ќе биде блокиран од таканаречениот „фронт на отпорот“.

— реклама —

Иран е близок сојузник на јеменското движење Хути, кое има влијание во областа околу овој стратешки поморски премин.

Новите потези на Техеран дополнително ги зголемуваат тензиите на Блискиот Исток и ја зголемуваат загриженоста за можни нарушувања на глобалните енергетски и трговски текови.