Иран ги следи објавите на американските војници? Се разгледува забрана за користење мобилни телефони

Американската војска разгледува можност да ја ограничи употребата на мобилни телефони на војниците распоредени на Блискиот Исток, поради стравувања дека објавите на социјалните мрежи можат да му помогнат на Иран при планирањето нови напади.

Според „Ројтерс“, врховниот командант на Централната команда на САД (ЦЕНТКОМ), адмирал Бред Купер, во интерно писмо ги предупредил американските војници дека фотографии и видеа објавени на интернет можат да му овозможат на Иран речиси во реално време да ја процени успешноста на ракетните и нападите со беспилотни летала.

— реклама —

Во неколку американски бази, меѓу кои и во Јордан, на војниците веќе им било најавено дека наскоро би можеле да мора да ги предадат своите мобилни телефони, а ваква мерка се разгледува и во други делови од регионот поради безбедносни причини.

„Директната и неизбежна цена на овие информации од отворени извори може да се мери со животите на американските војници и цивили во земјите од Заливот“, предупредил Купер, повикувајќи на дополнително зајакнување на мерките за оперативна безбедност.

— реклама —

Портпаролот на ЦЕНТКОМ, Тимоти Хокинс, изјави дека станува збор за потсетување до војниците за важноста од заштита на оперативните информации и дека ова е еден од приоритетите на командата.

— реклама —

Предупредувањето следува откако на социјалните мрежи беше објавено видео на американски војник, снимено со паметни очила со вградена камера, на кое се гледа како припадници на американската војска трчаат кон засолниште за време на ирански ракетен напад и напад со дронови врз воздухопловната база „Мувафак Салти“ во Јордан.

Според Купер, без вакви снимки Иран често не би можел да утврди дали неговите проектили ја погодиле целта, особено поради електронските системи за попречување и другите одбранбени мерки што ги користи американската војска.

„Ројтерс“ потсетува дека американските власти со години предупредуваат дека мобилните телефони и различни апликации, вклучително и фитнес-апликациите, можат да откријат податоци за локацијата на војниците и да бидат искористени за следење или таргетирање на воени бази.