Иран соопшти дека во моментов не води никакви преговори со Соединетите Американски Држави и дека не се планирани средби меѓу двете земји, демантирајќи ги изјавите на американскиот претседател Доналд Трамп.
Трамп претходно изјави дека се откажал од планираните воени напади бидејќи, како што рече, разговорите со Иран требало да започнат попладнето. Тој нагласи дека повеќе би сакал да се постигне договор отколку да дојде до ново крвопролевање, но не откри каде би се одржале разговорите ниту кој би учествувал во нив.
Портпаролот на иранското Министерство за надворешни работи, Есмаил Багаеи, категорично ги отфрли овие тврдења, истакнувајќи дека нема ниту активни преговори со Вашингтон, ниту договорени средби.
Тој посочи дека Иран во наредните денови нема намера да прима странски делегации, ниту да испраќа свои претставници на разговори во странство. Според него, единствените разговори што во моментов се водат се со Оман и се однесуваат на управувањето со Ормускиот теснец.
И висок ирански извор за „Ројтерс“ потврдил дека не се планирани разговори со САД, додавајќи дека министерот за надворешни работи Абас Арагчи ќе биде отсутен најмалку до крајот на неделата поради престој во Ирак.
Од почетокот на конфликтот, Трамп во повеќе наврати се закануваше со воена акција против Иран, но подоцна ги повлекуваше тие најави, повикувајќи се на можноста за дипломатско решение.
Во меѓувреме, спорот околу Ормускиот теснец останува една од главните точки на несогласување меѓу Вашингтон и Техеран. САД тврдат дека Иран требало да овозможи непречен поморски сообраќај, додека иранската страна смета дека договорите ја потврдуваат нејзината надлежност врз овој стратешки морски премин.
По одлуката на Трамп да не преземе воена акција, светските цени на нафтата денеска забележаа пад.
