Ирански и американски претставници одржуваат нова рунда разговори во Доха, по потпишувањето на меморандумот за ставање крај на војната и по меѓусебните напади во изминатиот период.
На состанокот, кој е посветен на технички прашања, главни теми се пловидбата низ Ормускиот теснец, евентуалното укинување на санкциите кон Иран и иднината на иранските залихи на високо збогатен ураниум.
Американскиот претседател Доналд Трамп изјави дека средбата во Доха може да биде значајна, но нагласи дека САД остануваат на ставот дека Иран не смее да поседува нуклеарно оружје.
„Состанокот во Доха можеби ќе биде важен, можеби не. Ќе видиме. Не сакаме Иран да има нуклеарно оружје, а тие се согласија на тоа“, изјави Трамп.
Во меѓувреме, Иран и Оман го одржаа и првиот состанок на новоформираниот Заеднички комитет за Ормускиот теснец, на кој се разговараше за идното управување со овој стратешки важен воден пат.
Заменик-министерот за надворешни работи на Иран, Казем Гарибабади, изјави дека на средбата биле разгледани актуелните прашања поврзани со теснецот, како и идното управување во согласност со одредбите од Меморандумот за разбирање од Исламабад.
Вашингтон и Техеран имаат рок до средината на август да постигнат траен мировен договор, кој треба да вклучува и решение за спорната иранска нуклеарна програма.
