Иранското Министерство за надворешни работи најостро ги осуди американските воздушни напади врз цели на југот на земјата, оценувајќи ги како „акт на агресија“ и грубо кршење на Меморандумот за разбирање.
Во соопштението се наведува дека американската војска во раните утрински часови извела напади врз повеќе центри за надзор и следење на јужниот брег на Иран, што, според Техеран, претставува прекршување на Повелбата на Обединетите нации и на договорот со кој беше предвиден прекин на воените операции.
Иранските власти упатија предупредување и до државите од јужниот брег на Персискиот Залив, истакнувајќи дека тие имаат обврска да не дозволат нивната територија или инфраструктура да биде користена за напади врз Иран.
„Секоја соработка во агресија против Иран ќе се смета за соучесништво во тој чин“, порача Министерството.
Воедно, Техеран ги повика Советот за безбедност на Обединетите нации и генералниот секретар на ОН да ги исполнат своите обврски, нагласувајќи дека иранските вооружени сили ќе го искористат правото на самоодбрана.
„Нема да се двоумиме да го браниме територијалниот интегритет, суверенитетот и безбедноста на Иран и ќе одговориме со напади врз изворите и местата од каде што се извршуваат нападите“, се наведува во соопштението на иранското Министерство за надворешни работи.
