Иранскиот парламент денеска испрати порака дека секој напад врз иранските интереси ќе биде проследен со брз и силен одговор, а претседателот на парламентот, Мохамад Багер Калибаф, истовремено потврди дека иранските вооружени сили извршиле напади врз американски бази.
„На секој напад врз интересите на Иран ќе следи силен и брз одговор“, изјавил Калибаф, пренесуваат иранските медиуми.
Иранскиот функционер повикал и на изнаоѓање нови начини за справување со економскиот притисок од САД и нивните сојузници.
„Мора да се најдат нови алтернативи за спротивставување на економските притисоци што непријателот ги врши врз нашите синџири на снабдување“, порача Калибаф.
Тој истовремено нагласил дека треба да се избегнуваат постапки што би можеле да го нарушат националното единство.
Во меѓувреме, „Волстрит џурнал“ објави дека милијарди долари поврзани со Иран секоја година минуваат низ сметки во американски банки, и покрај долгогодишните санкции чија цел е Техеран да биде изолиран од глобалниот финансиски систем.
Според весникот, овој финансиски канал претставува една од слабостите во напорите на американскиот претседател Доналд Трамп дополнително да ја заостри финансиската изолација на Иран.
Техеран, како што се наведува, и понатаму има корист од деценискиот банкарски систем што им овозможува на странските банки да вршат трансакции во американски долари преку банки во САД.
Според „Волстрит џурнал“, Иран користи фиктивни компании и посредни банкарски мрежи во земји како Обединетите Арапски Емирати, Кина и Хонгконг за прикривање на врските со ирански субјекти што се под санкции.
Иако Техеран сè повеќе се потпира на кинескиот јуан и криптовалутите, на земјата и натаму ѝ се потребни долари за дел од трговските обврски, како и за набавка на стоки, компоненти и технологии чиј увоз е ограничен.
