Американската војска минатата недела употребила меѓу 60 и 70 пресретнувачи од системот „Патриот“, како и повеќе од десетина ракети „ТХААД“, за да го одбие иранскиот ракетен напад врз американските сили во Јордан. Според „Волстрит џурнал“, Иран во нападот истрелал околу 20 балистички ракети, што повторно го отвора прашањето за високата цена на противракетната одбрана.
Иако нападот не бил целосно запрен, ниту еден американски војник не загинал. Сепак, иранските ракети погодиле борбени авиони и други летала во воздушната база „Мувафак Салти“ во Јордан.
Американски и регионални претставници оценуваат дека Иран сè поуспешно ја приспособува тактиката за да ја отежне работата на противвоздушната одбрана и да ги принуди САД да трошат скапоцени пресретнувачи.
Во последните напади Иран користи различни видови ракети, различни траектории и боеви глави. Во нападот врз Јордан биле употребени и боеви глави кои пред ударот се раздвојуваат на повеќе проектили, што дополнително го отежнува нивното пресретнување.
„Овие нови тактики покажуваат дека Иранците продолжуваат да се приспособуваат, да учат и да експериментираат и да гледаат што функционира, а што не“, изјавил Фабијан Хинц, стручњак за иранските ракетни сили од организацијата „Конфликт армамент рисрч“.
Во јули, во еден од иранските ракетни напади врз Јордан, загинале тројца американски војници. Американски претставници тогаш тврделе дека Иран пред нападот преку кинески извори набавил сателитски снимки со висока резолуција од американската база.
Од Пентагон ги отфрлаат тврдењата дека американските резерви на пресретнувачи се при крај. Портпаролот Шон Парнел изјавил дека информациите за исцрпени залихи се „целосно неточни“ и дека американската војска и понатаму има способност да одговори на сите закани.
И американскиот претседател Доналд Трамп изјавил дека САД располагаат со голем број пресретнувачи и дека производството се зголемува. „Локхид Мартин“ во текот на 2025 година произвел рекордни 620 пресретнувачи „Патриот“, а целта е годишното производство да достигне околу 2.000.
Сепак, извештајот на генералниот инспектор на американското Министерство за одбрана, објавен оваа недела, укажува на „стратешки недостиг на залихи“ и на проблеми во производството и обновувањето на потрошената муниција.
Според податоците што ги објавил „Волстрит џурнал“, до средината на јули американската војска во текот на војната потрошила околу 1.700 пресретнувачи „Патриот“ и повеќе од 200 пресретнувачи „ТХААД“. Американските воени бродови дополнително истрелале околу 150 ракети „Стандард мисајл“ против ирански ракети и дронови.
Дел од американските претставници веќе ги оценуваат залихите на пресретнувачи „ПАК-3 Патриот“ и ракети „АТАКМС“ во Европа како критично ниски, а нивното обновување би можело да трае со години. Од друга страна, командантот на американската Централна команда, адмиралот Бред Купер, изјавил дека не е загрижен поради можен недостиг и дека војската е подготвена за секое сценарио.
Дополнителна загриженост предизвикува проценката дека Иран успеал да обнови дел од своите ракетни способности. Според американски и арапски извори, Техеран повторно активирал ракети што биле блокирани по американските напади и ја обновил производствената активност со користење претходно складирани делови.
Големата потрошувачка на американски пресретнувачи има последици и надвор од Блискиот Исток. Американските воени планери стравуваат дека испраќањето големи количества муниција кон регионот може да ја намали способноста на САД да одговорат на евентуални закани од Кина или Русија.
Притисокот врз американските залихи истовремено ги намалува и можностите за испорака на пресретнувачи за Украина, која се брани од руските воздушни напади.
Иран, од своја страна, се обидува да ја зголеми цената на американското воено присуство на Блискиот Исток. Според Хамидреза Азизи од Меѓународната кризна група, целта на иранскиот режим е американското присуство во регионот да стане „неодржливо и скапо“.
