Спроведувањето на мировниот договор меѓу САД и Иран нема да биде возможно доколку не заврши војната во Либан, порача ирански претставник во пресрет на денешните преговори меѓу двете земји во Швајцарија.
Сејед Мехди Табатабаи, заменик задолжен за комуникации и информирање во Кабинетот на иранскиот претседател, преку објава на социјалната мрежа Икс, предупреди дека продолжувањето на конфликтот во Либан може целосно да го загрози постигнатиот договор.
„Продолжувањето на злосторствата на ционистичкиот режим во Либан ќе доведе до поништување на целиот договор“, напиша Табатабаи.
Главниот ирански преговарач Мохамад Багер Багаи најави дека Техеран на денешната средба во Швајцарија ќе го отвори прашањето за, како што наведе, прекршувањето на почетниот мировен договор. Според иранската државна агенција „Фарс“, разговорите се очекува да продолжат до вечерните часови, но не и да траат подолго.
Во меѓувреме, иранскиот претседател Масуд Пезешкијан повторно нагласи дека Иран нема намера да развива нуклеарно оружје.
„Единственото што ја интересира Америка е да не поседуваме нуклеарна бомба. Нашиот врховен водач повеќепати јасно кажа дека не сакаме атомска бомба. Америка побара тоа да го ставиме и во писмена форма, а ние го сторивме тоа“, изјави Пезешкијан.
Преговорите во Швајцарија се одржуваат во услови на зголемени тензии на Блискиот Исток и неизвесност околу иднината на американско-иранските односи.
