Иран по нападот во Бејрут: САД играат „добар и лош полицаец“ со Израел

Иран остро ги критикуваше Соединетите Американски Држави по најновиот израелски напад врз јужните предградија на Бејрут, обвинувајќи го Вашингтон дека или нема волја, или нема способност да ги исполни своите обврски.

Претседателот на иранскиот парламент, Мохамад-Багер Галибаф, преку социјалната мрежа Икс порача дека нападот врз населбата Дахија покажал дека САД не се подготвени да го спречат својот сојузник Израел.

— реклама —

„Ционистичкиот упад во Дахија уште еднаш покажа дека на Америка ѝ недостасува или волја да ги исполни своите обврски, или способност да го направи тоа“, напиша Галибаф.

— реклама —

Тој додаде дека, според него, Вашингтон и Тел Авив ја играат добро познатата улога на „добар и лош полицаец“.

„Не можете да добивате отстапки така што на режимот ќе му дадете зелено светло. Играта на добар и лош полицаец е застарена. Ако ви недостасуваат волја и способност да ги исполните обврските, невозможно е да се зборува за продолжување на процесот“, порача Галибаф.

— реклама —

Според последните информации, САД во текот на преговорите со Иран се обиделе прашањето за Либан да го изостават од потенцијалниот договор за ставање крај на конфликтот. Сепак, иранските власти инсистираат Либан да биде дел од договорот, со цел да се прекинат израелските напади врз Хезболах, организација која има поддршка од Техеран.

На нападите реагирал и заменик-командантот на Здружениот штаб на иранската армија, кој, според иранските државни медиуми, изјавил дека израелските „злосторства“ нема да останат без одговор.

Во меѓувреме, новинар на американскиот портал „Аксиос“ објави дека Израел непосредно пред нападот врз предградијата на Бејрут ја известил американската војска во регионот за планираната операција.