Иранските вооружени сили тврдат дека во моментов користат нови беспилотни системи кои се понапредни од моделот „Араш-2“ и располагаат со поголема разорна моќ, прецизност и дострел.
Ова го изјави бригадниот генерал Мохамад Акраминија, кој истакна дека иранските сили нанеле сериозна штета врз американските воени бази на Блискиот Исток и дека голем број од нив биле привремено онеспособени. За овие тврдења засега нема независна потврда.
Според генералот, САД и натаму имаат можност брзо да ги обноват своите воени капацитети благодарение на присуството во Западна Азија, јужна Европа и Медитеранот, но нагласи дека Иран е подготвен да продолжи со операциите доколку конфликтот се продлабочи.
„Ќе продолжиме со операциите сè додека Американците не сфатат дека со агресија не можат да ја наметнат својата волја врз иранскиот народ“, изјави Акраминија, пренесе иранската новинска агенција „Мехр“.
Тој потврди дека новите беспилотни летала се помоќни од „Араш-2“, но не откри технички детали за нивните способности.
Генералот додаде дека за време на примирјето дел од воената опрема оштетена во американските напади повторно била ставена во функција, а новата опрема, според него, дополнително ги подобрила одбранбените способности на Иран и го направила неговиот воздушен простор „помалку безбеден за непријателот“.
