Иран воведе нови правила за пловидба низ Ормускиот теснец по договорот со САД

Иранските власти задолжени за управување со Ормускиот теснец објавија нови процедури за сите бродови што сакаат да минуваат низ овој стратешки важен поморски премин, откако беше потпишан меморандум за разбирање меѓу Техеран и Вашингтон.

— реклама —

Според новите правила, сите бродови ќе мора однапред да поднесат барање за транзит преку официјалните канали на иранската управа. Како единствени валидни канали се наведени официјалната интернет-страница и електронската пошта, а сопствениците на пловилата ќе треба да достават и важечки контакт-податоци.

— реклама —

Воедно, барањата мора да бидат доставени најмалку 48 часа пред пристигнувањето во Ормускиот теснец за да се избегнат евентуални доцнења при влез или излез од пловниот пат.

Иранските власти соопштија дека во следните 60 дена нема да се наплатуваат такси за безбедносни, заштитни и еколошки услуги, ниту пак за иранско осигурување поврзано со транзитот. Трошоците ќе ги покрива иранската влада.

— реклама —

Поради присуството на минирани подрачја и потребата од безбедна пловидба, бродовите ќе мора однапред да ги усогласат своите рути и времето на премин низ теснецот. Од Управата предупредија дека одговорноста за непочитување на правилата ќе ја сносат сопствениците на пловилата.

— реклама —

Овие мерки следуваат по меморандумот што електронски го потпишаа американскиот претседател Доналд Трамп и иранскиот претседател Масуд Пезешкијан, со посредство на пакистанскиот премиер Шехбаз Шариф. Според договорот, Иран повторно ќе го отвори Ормускиот теснец, додека САД ќе ја укинат поморската блокада, а во наредните 60 дена ќе продолжат преговорите за иранската нуклеарна програма и меѓународните санкции.