Нов бран на ескалација се случи меѓу САД и Иран, откако Техеран изврши ракетни напади и напади со беспилотни летала врз американски цели во Јордан, Кувајт, Ирак и Бахреин. Нападите уследија по продолжувањето на американските воени дејствија врз Иран.
Иранската Црвена полумесечина соопшти дека пет лица, меѓу кои и едно дете, загинале, а повеќе од 50 биле повредени во американски ракетен напад во јужен Иран. Според иранските власти, погоден бил дом во кој се одржувала свадбена прослава.
Американската војска соопшти дека е запознаена со извештаите за жртвите, но нагласи дека американските сили никогаш не таргетираат цивили.
Од Централната команда на САД наведоа дека нападите врз Иран следеле по обиди на Исламската револуционерна гарда да нападне комерцијален брод во Ормускиот Теснец и американски сили во регионот.
Иранската гарда потоа лансирала балистички ракети кон американската поморска база во Акаба, Јордан. Јорданските вооружени сили соопштија дека пресретнале 13 балистички ракети.
Иранските државни медиуми и Црвената полумесечина тврдат дека во последниот бран американски напади биле погодени и цивилни објекти на јужниот брег на Иран, вклучително и објект во округот Сирик, каде што се одржувала свадбена прослава.
Американскиот претседател Доналд Трамп претходно предупреди дека Иран ќе се соочи со „многу потешко и повисоко ниво“ на напади доколку возврати на американските дејствија.
