И покрај дипломатските напори за намалување на тензиите меѓу Вашингтон и Техеран, Иранската револуционерна гарда (IRGC) повторно упати остра закана до Соединетите Американски Држави, порачувајќи дека е подготвена веднаш да одговори на секоја закана или, како што наведува, „погрешна проценка на непријателот“.
Во соопштение објавено по последните воени случувања во регионот, IRGC истакна дека е „целосно подготвена да даде одлучен, моментален и болен одговор, поради кој противникот ќе зажали“ на секој чин на агресија насочен кон Иран.
Револуционерната гарда повторно ја употреби и пораката дека „прстот ѝ е на чкрапалото“, формулација што и претходно ја користеше за да ја нагласи својата подготвеност за воена реакција.
Заканите доаѓаат во период кога САД и Иран водат интензивни преговори за можен договор што би придонел за намалување на тензиите по повеќедневната размена на удари меѓу двете земји. Сепак, и покрај дипломатските сигнали, реториката од двете страни останува остра.
Според иранските власти, IRGC неделава предводела напади врз американски воени цели на Блискиот Исток, меѓу кои бази во Кувајт и Бахреин, седиштето на Петтата флота на американската морнарица, комуникациски и радарски системи, како и објекти поврзани со борбени авиони Ф-35, Ф-15 и Ф-16. Засега нема независна потврда за обемот на штетите и успешноста на овие напади.
Аналитичарите предупредуваат дека, и покрај напредокот во преговорите, длабоката недоверба меѓу Вашингтон и Техеран останува сериозна пречка и дека секој нов инцидент може повторно да ја турне регијата кон поширока воена ескалација.
