Семејство од Битола трага по Злате Дургутовски, кој е пријавен за исчезнат откако на 21 август излегол од домот и оттогаш не се вратил. Неговата сопруга Јована Ралевска апелира до сите кои можеби го виделе во Штип или на друга локација да помогнат во неговото пронаоѓање.
Според нејзиното сведоштво, Злате на 21 август околу 19:05 часот излегол од домот без телефон и без пари. Два дена подоцна, на 24 август, тој контактирал со сопругата преку телефон на друго лице и ѝ кажал дека се наоѓа во Штип, дека ногата му е во шина и дека нема пари за превоз до Битола.
Следното утро повторно ѝ се јавил и побарал да дојде во Штип со двете мали деца за да го врати дома. Ралевска, како што наведува, не успеала да отпатува поради немање средства и можност за организирање на враќањето истиот ден.
Оттогаш семејството нема нов контакт со него.
Од МВР за „Скопје1“ потврдија дека случајот е пријавен во СВР Битола.
„На 25.08.2026 во 19:28 часот во СВР Битола Ј.Р. пријавила дека нејзиниот сопруг З.Д. откако се упатил во Штип не одговарал на телефонските повици. Притоа посочила дека З.Д. на 24.08.2026 контактирал со неа и ѝ кажал дека се наоѓа во Штип и нема пари да се врати. Се преземаат мерки за пронаоѓање на лицето“, велат од МВР.
Сопругата апелира до граѓаните доколку го забележат Злате во Штип, околината или на друга локација, да го пријават случајот во полиција или да контактираат со семејството.
Според описот на сопругата, во моментот би требало да има малку подолга коса и брада, а можно е да носи и капче. Таа посочува дека најважно е, доколку некој го сретне, да му овозможи да се јави за да може семејството да му организира превоз до Битола.
„Очајно го бараме да се јави и да му организираме превоз да се врати. Има две малечки деца што чекаат на него“, апелира Ралевска.
Доколку имате информации за Злате Дургутовски, пријавете ги во најблиската полициска станица или контактирајте со семејството на 078/550-521.
