Пратеникот од Левица, Реџеп Исмаил, со објава на социјалните мрежи реагира дека Министерството за социјална политика, демографија и млади се оградува од проблемот со доцнењето на исплатите на надоместоците за породилно отсуство, откако на негово пратеничко прашање добил одговор дека институцијата „не е надлежна“.
Според Исмаил, во официјалниот допис од Министерството тој бил упатен прашањето да го достави до „надлежна институција“, што пратеникот го оцени како неприфатливо институционално префрлање на одговорноста.
„Каква е реакцијата на институцијата која во своето име ја носи ‘демографијата’ и чија основна задача е социјалната заштита? Класично бирократско префрлање на топката“, вели Исмаил.
Тој посочува дека Министерството за социјална политика има надлежности поврзани со социјалната политика, семејството и децата, односите меѓу родителите и децата, како и заштитата на децата и жените.
Исмаил признава дека финансиската реализација на надоместокот за породилно отсуство се врши преку Фондот за здравствено осигурување, но смета дека тоа не е причина Министерството целосно да се дистанцира од проблемот.
„Јас како пратеник немам деловничко право да поставувам пратенички прашања директно до ФЗОМ и УЈП, затоа се обраќам до вас, креаторите на политиките. Прашање за ова е упатено и до Министерството за здравство, но овој однос на Министерството за социјална политика е недозволив“, наведува тој.
Пратеникот дополнително реагира што Министерството во чиј назив стои и „демографија“ се прогласува за ненадлежно за прашање што директно ги засега мајките и семејствата.
„Изгледа дека за вас ‘демографија’ е само збор на таблата пред Министерството и пазарџиска категорија во изјавите на министерката за образование“, порача Исмаил.
Според него, наместо само да констатира дека не ја врши исплатата, Министерството треба да иницира координација со надлежните институции, да го отвори проблемот пред Владата и, доколку е потребно, да предложи системски и законски решенија.
„Мајките не смеат да бидат жртви на вашата некомпетентност, мрзеливост и институционална дискоординација. Потребно е системско решение, а не бирократски изговори“, порача пратеникот од Левица.
