Агенцијата за финансиска поддршка во земјоделството и руралниот развој на сметките на 9.191 субјект исплати речиси 260 милиони денари за повеќе мерки.
Директорот на Агенцијата, Никица Бачовски, информира дека во еден ден биле исплатени повеќе мерки и за земјоделците и за сточарите.
„На сметките на 7.689 лица исплатени се 84,8 милиони денари за вршење земјоделска дејност во подрачја со ограничени можности или попозната како ПОМ. 39,3 милиони денари, пак, се исплатени за сите што имаат аплицирано и исполнети услови за мерката 1.13 лозов калем и саден материјал, а 35,3 милиони денари се исплатени за сите што имаат поднесено и исполнето услови за добивање поддршка за користење домашен сертифициран семенски материјал. Исто така, во денешната исплата исплатени се речиси 27,2 милиони денари за амортизирани несилки од октомври 2019 до септември 2020 година. 63,6 милиони денари за заклани јагниња во периодот од јануари 2020 до септмври истата година. А на сметките на сите живинари што имаат заклани бројлери од мај 2019 до септември 2020 година исплатени им се 8,5 милиони денари“, информира Бачовски.
Агенцијата продолжува со контуинирана обработка и исплата на земјоделските субвенции. Средствата за субвенции се исплаќаат во еден ден и без селекција за сите што правно законски ги исполниле условите за добивање финансиска поддршка во земјоделството.
