Историски успех на српските неврохирурзи: Првпат применета нова метода при операција на мозочна аневризма

Лекарски тим од Универзитетскиот клинички центар на Војводина во Србија успешно ја изведе првата операција на аневризма на средната мозочна артерија со примена на современа интраоперативна видеоангиографија со индоцијанин зелено (ICG).

Операцијата ја извршил д-р Небојша Ласица, а пациентот бил отпуштен на домашно лекување третиот ден по интервенцијата, со уреден постоперативен тек.

— реклама —

Станува збор за метода што овозможува во текот на самата операција да се следи протокот на крв низ мозочните артерии и да се провери дали аневризмата е целосно затворена, без да се наруши циркулацијата низ околните крвни садови.

При хируршкиот третман, на вратот на аневризмата се поставува титаниумска штипка, со што таа се исклучува од крвотокот. Најголемиот предизвик е целосно затворање на аневризмата, без да се попречи протокот на крв низ главната артерија и нејзините помали гранки.

— реклама —

Новата технологија овозможува по поставувањето на штипката во вената на пациентот да се внесе флуоресцентна боја. Специјален оперативен микроскоп потоа го прикажува нејзиното движење низ крвните садови во реално време. Така, неврохирургот за неколку секунди може да утврди дали аневризмата е целосно затворена и дали протокот на крв е непречен.

Во интервенцијата бил користен модулот GLOW800 на компанијата „Лајка“, кој со технологија на проширена реалност овозможува приказ на крвните садови директно врз сликата од оперативното поле.

— реклама —

Доколку се забележи дека аневризмата не е целосно затворена или дека е загрозен протокот на крв, положбата на штипката може веднаш да се коригира, во текот на истата операција. Методата не бара зрачење и може да се повторува повеќепати за време на интервенцијата.

Од Клиничкиот центар наведуваат дека воведувањето на оваа технологија е резултат на стратешкото планирање на Клиниката за неврохирургија, предводена од професорот д-р Ѓула Ѓилвеси, како и на континуираната едукација на медицинскиот персонал.

Д-р Ласица претходно се усовршувал во Универзитетскиот медицински центар во Питсбург и во лабораторијата „Ротон“ при клиниката „Мајо“ во Рочестер, во САД.

Во операцијата учествувал и анестезиолошкиот тим, предводен од доцентката д-р Сања Маричиќ Пријиќ, како и медицинските сестри-инструментарки, чија координирана работа е важна за безбедно изведување на ваквите микрохируршки интервенции.