Историско Крушево подготвено за Илинден, градот се полни со гости за продолжениот викенд

Историско Крушево е подготвено за чествувањето на Илинден – Денот на Републиката. Градот веќе се полни со гости кои пристигнуваат за продолжениот викенд и традиционалните манифестации по повод 2 Август.

Вечерва започнува традиционалната манифестација „10 Дена Крушевска Република“, со која се одбележуваат 123 години од Илинденското востание и Крушевската Република.

— реклама —

Програмата ќе почне со положување цвеќе на гробот на Даме Груев, по што делегации ќе ја посетат Спомен-куќата на Смилевскиот конгрес во селото Смилево.

Во 18 часот, пред Столбот на Крушевската Република кај црквата „Свети Никола“, ќе пристигнат околу 120 илинденски коњаници, по што ќе се формира свечена поворка кон Гумење.

— реклама —

Во текот на денот ќе биде оддадена почит и на гробот на Питу Гули, Партизанските гробишта, гробот на Тоше Проески, криптата на илинденските востаници и бистата на Веле Марко.

— реклама —

Во 19:30 часот пред споменикот „Илинден“ ќе биде отворена изложбата на Државниот архив „Илинденското востание во архивската меморија“.

Свеченото отворање на манифестацијата е закажано за 20 часот на Гумење. Предвидени се обраќање на градоначалникот Нико Чонески, читање на Крушевскиот манифест и традиционалното симболично пукање од Црешовото топче – симбол на почетокот на Илинденското востание.

Централната прослава ќе се одржи утре, 2 август, на Мечкин Камен, каде што е најавено обраќање на потпретседателот на Собранието, Антонио Милошоски.

Претседателот на Собранието, Африм Гаши, втора година по ред нема да присуствува на одбележувањето на Денот на Републиката во Крушево. Според најавите, неговото отсуство годинава е поради учество на конференција во Египет.