Италија ќе распореди противвоздушен систем SAMP-T во централна Турција како дел од одбранбениот план на НАТО, соопшти турското Министерство за одбрана.
Според соопштението, системот ќе биде стациониран во Третата главна воздухопловна борбена команда во Коња, со цел дополнително да се зајакне воздушната одбрана на Алијансата.
SAMP-T е мобилен ракетен систем земја-воздух, развиен во француско-италијанско партнерство, наменет за пресретнување борбени авиони, беспилотни летала, крстосувачки ракети и одредени видови балистички ракети.
Од март наваму, силите на НАТО, меѓу кои и турските и италијанските, собориле четири балистички ракети, истрелани од Иран кон турска територија. Поради тоа, Алијансата дополнително распоредува и батерија од системот „Патриот“ во воздухопловната база Инџирлик во јужна Турција.
Генералниот секретар на НАТО, Марк Руте, за време на посетата на Анкара во април, порача дека Алијансата ќе направи „сè што е потребно за одбраната“ на своите членки. Турција ќе биде домаќин на самитот на НАТО на 7 и 8 јули.
