Италија се соочува со екстремни горештини, температурите достигнаа 41 степен

Италија денеска се соочува со врвот на интензивниот топлотен бран, при што во неколку региони температурите се приближија до 40 степени Целзиусови, предизвикувајќи вонредни мерки, проблеми во секојдневниот живот и зголемени здравствени ризици.

— реклама —

Според италијанските медиуми, 82-годишен турист од Рим починал откако му се слошило на плажа во Марина ди Гросето, непосредно по излегувањето од морето. Се претпоставува дека високите температури придонеле за трагичниот исход.

Метеоролозите предупредуваат дека африканскиот антициклон „Каронте“ носи најекстремни температури во тековниот топлотен бран. Во Тоскана и делови од Падинската Низина се очекуваат температури до 40 степени, додека во внатрешноста на Сардинија се измерени и 41 степен.

— реклама —

Северна Италија продолжува да бележи рекордни температури. Во Болцано е регистрирана најтоплата јуниска ноќ досега, при што температурата не се спуштила под 25,4 степени.

— реклама —

Екстремните горештини веќе предизвикуваат нарушувања во секојдневниот живот. Во Џенова е запрено работењето на панорамскиот лифт во старото пристаниште поради недостиг на климатизација, а италијанската пејачка Лоредана Берте го откажа својот концерт во Бергамо.

Проблеми се пријавени и во болниците и на работните места. Во болницата „Баџовара“ во Модена пациентите се пожалиле на високи температури на одделенијата, додека синдикатите предупредуваат на неподносливи услови во музеите во Фиренца.

— реклама —

Здружението на потрошувачи „Асоутенти“ проценува дека поради зголемената употреба на клима-уреди, поголемата потрошувачка на вода и дополнителните трошоци за разладување, месечните трошоци на домаќинствата би можеле да достигнат и до 600 евра.