Платформата за донации „Е-крауд“ упати итен апел за помош за 32-годишната Ивана, која се соочува со тежок облик на карцином на матката во четврти стадиум.
Ивана е мајка на седумгодишно девојче, кое секојдневно ја очекува да се врати дома. Нејзината здравствена состојба е сериозна, но, како што се наведува, постои надеж преку третман во Турција, за кој се потребни значителни финансиски средства.
Семејството не е во можност самостојно да ги обезбеди потребните пари, поради што се повикува јавноста да се вклучи во хуманата акција.
„Ова не е само борба за здравје. Ова е борба на една мајка да остане покрај своето дете. Борба за уште еден ден, уште една прегратка“, стои во апелот.
Од платформата апелираат граѓаните да донираат согласно своите можности и да го споделат апелот, со цел да стигне до што поголем број луѓе.
„Секоја донација значи надеж. Секое споделување значи шанса“, се наведува во повикот.
Хуманата акција е во тек, а времето, како што се потенцира, е клучен фактор за понатамошниот тек на лекувањето.
