Ива Михаилова без двата пасоша и со забрана за напуштање на Кочани стигнала до Бугарија

На Ива Михаилова уште од 9 октомври 2025 година ѝ биле одземени и македонскиот и бугарскиот пасош, а судот ѝ забранил да ја преминува државната граница со лична карта и да го напушта Кочани. Ова го соопшти Обвинителството, откако Михаилова се појави во Бугарија, додека македонската и бугарската гранична полиција немаат евиденција за нејзино неодамнешно легално преминување на границата.

Според Обвинителството, мерките биле определени по предлог на надлежниот јавен обвинител, а покрај одземањето на двете патни исправи и забраните за движење, Михаилова имала и обврска редовно да се јавува кај службено лице.

„На обвинетата, по предлог на јавен обвинител, уште од 09.10.2025 година ѝ беа одземени две патни исправи (македонска и бугарска), ѝ беше изречена забрана за преминување државна граница со лична карта, забрана за напуштање на Кочани и обврска да се јавува кај службено лице“, соопшти Обвинителството.

— реклама —

Оттаму нагласуваат дека ризикот од бегство бил една од главните причини поради кои обвинителството се противело на враќањето на нејзината патна исправа.

„Надлежниот јавен обвинител ги презеде сите чекори во негова надлежност за обезбедување на лицето, а ризикот од бегство беше една од клучните основи поради кои обвинителството повеќе пати даваше негативно мислење во однос на барањето за враќање на патната исправа“, наведуваат од Обвинителството.

Овој одговор следува по информациите што ги објави „Скопје1“, а кои подоцна ги потврди и портпаролот на МВР, Гоце Андреевски, дека за Михаилова нема евидентиран излез од Македонија.

— реклама —

Дополнително, преку Заедничкиот контакт-центар со Бугарија биле направени проверки и кај бугарската гранична полиција, од каде што било потврдено дека нема евидентиран ниту легален влез на Михаилова во Бугарија.

Според граничните евиденции, нејзиниот последен регистриран влез во Бугарија бил во септември 2025 година, а во октомври истата година бил евидентиран нејзин излез од Бугарија, односно влез во Македонија.

— реклама —

Наспроти овие податоци, адвокатот на Михаилова во изјава за бугарската телевизија НОВА тврдеше дека заедно ја преминале границата преку официјален граничен премин, покажувајќи документи пред македонските гранични службеници.

„Преку граничен премин поминавме. Ги извадивме документите и поминавме. Луѓето од македонска страна добро знаеја дека е Ива Михаилова. Никој ништо не кажа. Разговаравме и тргнавме“, изјави адвокатот.

Самата Михаилова, прашана кога ќе се врати во Македонија, одговори дека тоа дополнително ќе го проценат.

Со одговорот на Обвинителството сега се потврдува дека за Михаилова постоеле конкретни судски ограничувања, вклучително и забрана за преминување на државната граница со лична карта и забрана за напуштање на Кочани.

Останува неразјаснето како обвинетата стигнала во Бугарија, имајќи предвид дека, според официјалните информации, двете патни исправи ѝ биле одземени, имала судска забрана за преминување на границата, а ниту една од двете држави нема евиденција за нејзино легално преминување.

Засега нема официјален одговор дали надлежните институции утврдиле прекршување на судските мерки и какви дополнителни дејства ќе бидат преземени за обезбедување на нејзиното присуство во постапката.