Ива Михаилова од Бугарија бара да учествува преку видеоврска на судењето во Кочани, тврди дека вештачењата ја докажуваат нејзината невиност

Ива Михаилова побарала да учествува преку видеоврска на денешното судско рочиште во Кочани, во постапката што се води против неа. Во изјава за Бугарската национална телевизија (БНТ), таа соопштила дека нејзиниот адвокат поднел барање за далечинско учество, а се очекува на денешното рочиште да бидат разгледани две вештачења за кои тврди дека ја потврдуваат нејзината невиност во сообраќајната несреќа во која загина едно лице, а неколку други беа повредени.

Михаилова на 12 октомври замина во Бугарија, без претходна дозвола од македонските власти, каде што, како што изјавува таа, заминала за да побара лекување на повредите здобиени во несреќата. Таа вели дека сè уште не знае колку долго ќе трае лекувањето, бидејќи има трајни последици од повредите.

— реклама —

Според нејзините зборови, лекувањето започнало пред три до четири недели, а рехабилитацијата ја почнала неодамна. Таа тврди дека поради недостигот од соодветна рехабилитација во Кочани останала со последици што ѝ го отежнуваат секојдневното функционирање.

Михаилова посочила и дека има проблеми со ’рбетот и вкочанетост на екстремитетите. Доколку лекарите во Бугарија не успеат да ги решат здравствените проблеми, таа најавила можност да биде упатена на лекување во Израел.

— реклама —

Во интервјуто изнела и обвинувања за наводен постојан полициски надзор во периодот пред заминувањето од Македонија. Тврди дека пред нејзиниот дом имало полициско присуство, дека била следена и дека биле вршени претреси, вклучително и со употреба на дронови. Според неа, барањето за внатрешна контрола во врска со овие постапки останало без одговор.

— реклама —

Таа оценила дека станувало збор за психолошко вознемирување, кое, според нејзиното тврдење, започнало откако го истакнала својот бугарски идентитет. Михаилова упатила критики и кон медиумите во Македонија, обвинувајќи ги дека објавувале невистини за неа и за Бугарија и дека придонеле за создавање негативно расположение кон неа.

Во однос на судската постапка, Михаилова изразила неизвесност дали ќе ѝ биде дозволено да учествува преку видеоконференција. Таа потврдила дека нејзиниот адвокат го доставил барањето и дека се очекува одлука од судот и обвинителството.

— реклама —

Двете вештачења што треба да бидат разгледани се изработени по барање на нејзината одбрана, а не од вештаци назначени од обвинителството во Кочани. Михаилова тврди дека нивната содржина ги потврдува нејзините наводи за несреќата, вклучително и трагите од другото возило во нејзината сообраќајна лента.

„И двата наода укажуваат на мојата невиност. Се надевам дека вистината на крајот ќе излезе на виделина“, изјавила таа.