Изборите во Брвеница се ближат, ДИК го утврди гласачкото ливче

Подготовките за предвремените локални избори во Општина Брвеница, закажани за 18 октомври 2026 година, продолжуваат со утврдувањето на изгледот и содржината на гласачкото ливче.

— реклама —

Државната изборна комисија (ДИК) на својата 19. седница едногласно ги усвои содржината, формата и заштитните елементи на гласачкото ливче. Оваа точка била разгледана зад затворени врати, без присуство на јавноста, согласно со Деловникот и Изборниот законик, информираат од Комисијата.

— реклама —

Од ДИК наведуваат дека при подготовката се почитувани законските правила за употреба на јазиците и писмата. Ливчето ќе биде отпечатено на македонски јазик и кирилско писмо, како и на службениот јазик и писмо што го употребуваат најмалку 20 проценти од жителите на општината, во согласност со законските услови. Ќе бидат вклучени и јазикот и писмото на заедницата на која ѝ припаѓаат кандидатите.

Редоследот на кандидатите и нивните подносители ќе биде утврден според единствената листа на кандидати. На главниот дел од гласачкото ливче ќе бидат наведени општината, бројот на гласачкото место, називот и симболот на подносителот, како и редниот број и името и презимето на кандидатите. На кочанот ќе се наоѓаат серискиот број, општината и бројот на гласачкото место.

— реклама —

За делот од седницата што се одржал без присуство на јавноста, ќе биде составен посебен записник, кој заедно со тонската снимка ќе биде архивиран, но нема да биде јавно објавен.

На истата седница, членовите на ДИК едногласно го усвоиле и записникот од претходната, 18. седница.