Наместо да плати наводна сообраќајна глоба од само 460 денари, 44-годишен жител на Неготино останал без 27.000 денари, откако бил измамен преку лажна СМС-порака.
Случајот бил пријавен на 19 август во ОВР Неготино. Според пријавата, мажот добил порака во која било наведено дека сторил сообраќаен прекршок, а за плаќање на глобата од 920 денари му бил понуден попуст од 50 проценти, односно износ од 460 денари.
Следејќи ги инструкциите од пораката, тој со платежната картичка на неговата сопруга започнал постапка за уплата. Откако добил известување дека трансакцијата е успешно реализирана, набргу пристигнала и друга порака.
При проверка на состојбата на сметката, сфатил дека наместо 460 денари, од сметката му биле повлечени 27.000 денари.
„Пријавителот ги следел инструкциите и со картичката на неговата сопруга ја започнал постапката за уплата, по што му стигнала порака за успешна трансакција, а по кратко добил уште една порака и откако ја проверил сумата што му е повлечена од сметката, сфатил дека бил измамен“, информираше Ана Милевска-Ѓеорѓиева, портпаролка на СВР Велес.
Од МВР предупредуваат граѓаните да не отвораат сомнителни СМС-пораки и да не вршат плаќања преку линкови добиени на овој начин. Се препорачува внимателно да се проверува адресата на испраќачот, бидејќи официјалните институции користат службени интернет-домени.
МВР потсетува и дека автентичните СМС-известувања за сообраќајни прекршоци се испраќаат исклучиво од испраќачот „MVR-SC“ и задолжително содржат регистарска ознака на возилото.
Граѓаните се советуваат да користат и двофакторска автентикација за дополнителна заштита на своите сметки, а секоја сомнителна порака веднаш да ја пријават во надлежните институции или во својата банка.
