Измамнички кол-центри и во Македонија: Европол разби меѓународна мрежа, запленети над 100 сервери

Македонија е меѓу земјите во кои истражителите идентификувале сомнителни кол-центри поврзани со голема меѓународна мрежа за инвестициски измами, чии потенцијални жртви се наоѓаат во повеќе од 50 држави. Во координирана полициска акција спроведена на 3 ноември, со поддршка на Европол и Евроџаст, запленети се повеќе од 100 сервери, а уапсени се седуммина осомничени.

Според информациите објавени од Европол, во операцијата учествувале надлежните органи на Македонија, Албанија, Кипар, Финска, Германија, Израел и Косово. Акцијата била насочена кон компанија осомничена дека обезбедувала лажни интернет-платформи за тргување, кои криминални групи ги користеле за извлекување пари од граѓани.

Особено значајно за Македонија е откритието дека истражителите идентификувале осомничени клиенти на оваа компанија кои управувале со измамнички кол-центри во Македонија, Албанија и Косово.

— реклама —

Преку овие центри, според сомнежите на истражителите, оператори контактирале потенцијални жртви и ги убедувале да вложуваат во криптовалути, девизи и акции, ветувајќи им брза и висока заработка.

Измамата започнувала со реклами на интернет, кои ги насочувале граѓаните кон навидум легитимни платформи за инвестирање. Личните податоци на заинтересираните лица потоа биле продавани на криминални групи кои управувале со кол-центрите.

Потенцијалните жртви најпрво биле убедувани да вложат помали суми. На нивните кориснички профили потоа се прикажувале фиктивни добивки, со што се создавал впечаток дека инвестицијата е успешна.

— реклама —

Лажните брокери го користеле тоа за да ги убедат граѓаните да вложуваат сè поголеми износи. Кога жртвите ќе побарале да ги повлечат парите, започнувале одложувања и изговори, по што комуникацијата целосно прекинувала.

Европол проценува дека финансиската штета од истражуваните измами надминува четири милиони евра.

Во последната акција биле извршени претреси на 17 локации, при што биле запленети сервери, други доказни материјали и имот. Седуммина осомничени биле уапсени со цел нивна екстрадиција во Германија.

— реклама —

Истрагата ја предводи Јавното обвинителство во германскиот град Ицехое, а започнала уште во 2022 година, кога брачен пар од Германија пријавил дека не може да ги повлече парите вложени преку интернет-платформа за тргување.

Првите меѓународни полициски акции биле спроведени во 2022 и 2025 година. Анализата на тогаш запленетите докази ги довела истражителите до компанија за која постојат сомнежи дека од Кипар и Израел обезбедувала техничка инфраструктура за криминалните групи.

Станува збор за модел во кој техничката инфраструктура за измами се нуди како услуга, овозможувајќи им на различни криминални групи да користат готови лажни платформи и да контактираат жртви преку сопствени кол-центри.

— реклама —

Европол обезбедил аналитичка и оперативна поддршка, додека Евроџаст ја координирал меѓународната правосудна соработка, вклучувајќи европски налози за истрага, апсење и замрзнување имот.

Засега Европол не соопштува колку кол-центри биле идентификувани во Македонија, каде се наоѓале, дали меѓу седумтемина уапсени има македонски државјани и дали при последната акција биле извршени претреси на македонска територија.

Официјално е потврдено дека македонските надлежни органи биле вклучени во меѓународната истрага и дека истражителите откриле сомнителни врски со оператори на измамнички кол-центри во земјава.