Организираниот криминал во Европската Унија и натаму брзо се приспособува на новите околности и ги користи новите можности за дејствување, и покрај тоа што полициските операции успешно ги нарушиле активностите на голем број криминални мрежи, се наведува во најновиот извештај на Европол.
Според извештајот, од 821 криминална мрежа идентификувана во 2024 година, околу 76 проценти повеќе не се сметаат за најопасни благодарение на успешните полициски акции.
Сепак, во истиот период биле идентификувани 533 нови криминални мрежи, што, според Европол, ја покажува високата способност на организираниот криминал брзо да се приспособува. Агенцијата предупредува дека криминалните групи функционираат како меѓусебно поврзани системи, што им овозможува брзо да се преструктурираат, да воспоставуваат нови соработки и да продолжат со своите активности дури и по полициски интервенции.
Во извештајот особено се истакнува растечката улога на сајбер криминалот. Криминалните мрежи сè повеќе користат дигитални платформи, шифрирани комуникации, вештачка интелигенција, криптовалути и сложени финансиски шеми за перење пари и прикривање на незаконските активности.
Претставниците на Европол и на Европската комисија оценуваат дека за ефикасна борба против организираниот криминал е потребен пристап што ќе го опфати целото општество, преку поинтензивна соработка меѓу полицијата, владите и приватниот сектор, како и поголеми инвестиции во разузнавачки истраги и современи дигитални алатки.
Европскиот комесар за внатрешни работи Магнус Брунер истакна дека борбата против организираниот криминал бара заеднички европски пристап и дополнително зајакнување на мандатот на Европол.
Вршителот на должноста директор на Европол, Јирген Ебнер, порача дека секоја разбиена криминална мрежа го ослабува криминалниот екосистем, но предупреди дека тој многу брзо повторно се обновува.
Во извештајот се наведува дека криминалните мрежи денес дејствуваат во широк спектар на нелегални активности – од трговија со дрога и луѓе, до сајбер измами – и опфаќаат стотици илјади членови од различни националности ширум Европа.
