И покрај најавите за примирје меѓу Соединетите Американски Држави и Иран, кое според одредени информации предвидува и прекин на борбите со Хезболах, Израел нема намера да се повлече од јужен Либан.
Израелскиот министер за одбрана, Израел Кац, порача дека израелските одбранбени сили ќе останат во безбедносните зони во Либан, Сирија и Газа без временско ограничување.
„Премиерот Бенјамин Нетанјаху и јас водиме јасна политика според која израелските одбранбени сили ќе останат во безбедносните зони во Либан, Сирија и Газа, без временско ограничување, со цел оттаму да ја штитат границата и израелските заедници од џихадистички елементи“, се наведува во изјавата на Кац.
Тој додаде дека овие безбедносни зони ќе бидат „исчистени од локалното население“, а целата, како што ја нарече, терористичка инфраструктура, над и под земја, ќе биде уништена, вклучително и објекти во пограничните села кои, според Израел, биле користени како упоришта на Хезболах.
Кац оцени дека задржувањето на безбедносните зони претставува едно од најголемите достигнувања на израелската армија во текот на војната и нагласи дека Израел се спротивставува на какво било повлекување од Либан, без оглед на меѓународните притисоци.
„Нема да ги загрозиме безбедносните интереси на Израел и заштитата на нашите граѓани и нема да се повлечеме од безбедносните зони“, истакна Кац.
Тој посочи дека премиерот Нетанјаху овие ставови му ги пренел и на американскиот претседател Доналд Трамп, како и на други високи американски претставници, додека лично разговарал со американскиот министер за одбрана, Пит Хегсет.
Воедно, Кац упати и предупредување до Техеран, наведувајќи дека доколку Иран го нападне Израел поради случувањата во Либан, израелскиот одговор ќе биде „силен и со полна сила“.
„Посветени сме исклучиво на нашите граѓани и на безбедноста на Државата Израел“, порача израелскиот министер за одбрана.
