Израелската армија соопшти дека денеска извршила напади врз цели на Хезболах во јужните предградија на Бејрут, откако либанската шиитска група истрелала проектили кон северен Израел.
Во заедничко соопштение на израелскиот премиер Бенјамин Нетанјаху и министерот за одбрана Израел Кац се наведува дека нападот бил одговор на ракетирањето на израелска територија.
„Израелските одбранбени сили нападнаа терористички цели на терористичката организација Хезболах во населбата Дахија во Бејрут, како одговор на нападите врз израелска територија“, се вели во соопштението.
Претходно, израелската армија објави дека Хезболах истрелал три проектили кон населени места во северниот дел на Израел, оценувајќи дека станува збор за јасно прекршување на примирјето.
Од Хезболах засега нема официјален коментар за израелските напади, но групата потврди дека лансирала ракети и беспилотни летала кон израелски воени позиции во јужен Либан.
Безбедносни извори од Либан изјавиле дека нападот врз Дахија бил прецизен удар изведен со две ракети.
Новата ескалација доаѓа во чувствителен момент, кога САД и Иран се обидуваат да постигнат договор за ставање крај на конфликтот во регионот. Минатонеделниот израелски напад врз Дахија веќе предизвика размена на оган меѓу Израел и Иран и ги зголеми стравувањата од поширока регионална ескалација.
Според медиумските извештаи, Вашингтон и Техеран се блиску до договор кој би можел да придонесе за смирување на тензиите на Блискиот Исток, додека Иран претходно најави дека прекинот на борбите во Либан е едно од прашањата поврзани со пошироките преговори со САД.
