Израелските сили извршиле осум воздушни напади врз воената база Абу Духур во сириската провинција Идлиб, при што е причинета материјална штета, но нема информации за жртви, објави сириската државна телевизија.
Според наводите, цел на нападите била пистата на воздушната база, која се наоѓа во северозападниот дел на Сирија. Израелската армија засега не го коментирала нападот, а без официјален одговор останале и турските власти.
Сирискиот опсерваториум за човекови права, организација со седиште во Велика Британија, која ја следи воената состојба во Сирија, соопшти дека во базата претходно биле присутни странски борци, но дека неодамна им било наложено да ја напуштат. Според Опсерваториумот, Турција, која е најголем поддржувач на сириската влада, во моментов ја обновува воздушната база, која со години не била во функција поради воениот конфликт.
На нападот реагираше и американскиот амбасадор во Турција и специјален пратеник за Сирија, Том Барак. Тој на социјалната мрежа „Икс“ изрази „длабока загриженост“ поради, како што наведе, потврдените израелски воздушни напади врз Абу Духур, оценувајќи ги како „непотребна ескалација“, која не придонесува за стабилноста во регионот.
Барак истакна дека владата на привремениот сириски претседател Ахмад ал-Шараа не зазела непријателски став кон Израел и не одржувала посреднички сили, туку повеќепати покажала подготвеност за намалување на тензиите.
Тој најави дека САД и понатаму ќе посредуваат во разговорите меѓу двете страни, со цел дипломатските напори да имаат предност пред нова воена ескалација.
Односите меѓу Израел и Турција во последниот период се дополнително влошени поради случувањата во Сирија. Тензиите се зголемија по падот на владата на Башар ал-Асад во декември 2024 година, кога бунтовничките сили влегоа во Дамаск.
По падот на Асад, Израел изврши стотици воздушни напади врз цели низ Сирија. Израелските напади со беспилотни летала врз јужните предградија на Дамаск минатата година усмртија осум сириски војници, а повеќе лица беа повредени.
Иако новите власти во Дамаск порачаа дека не сакаат конфликт со Израел, израелската страна и понатаму со недоверба гледа на сириската влада, која ја предводат поранешни исламистички бунтовници.
