Израел ја отвори првата амбасада во Словенија, пред зградата протестираа пропалестински демонстранти

Израел денеска ја отвори својата прва амбасада во Словенија, а по тој повод во Љубљана допатува израелскиот министер за надворешни работи Гидеон Саар, кој се сретна со својот словенечки колега Тоне Кајзер.

По средбата, Саар отворањето на амбасадата го оцени како „историски ден“. Тој го опиша Израел како единствена демократија на Блискиот Исток и важен партнер на Европа, нагласувајќи ја и неговата улога во европската безбедност.

— реклама —

Пред новата амбасада се собраа неколку стотици пропалестински демонстранти, кои протестираа против посетата на Саар и побараа затворање на дипломатското претставништво.

— реклама —

Словенечкиот министер Кајзер порача дека отворањето треба да придонесе за подобри односи меѓу двете земји, со посилен дијалог и соработка. Двајцата министри потпишаа и договор за соработка во образованието, науката, културата, младите и спортот.

Отворањето на амбасадата претставува пресврт во досегашната словенечка политика кон Израел. Претходната влада на Роберт Голоб во 2024 година ја призна Палестина, а во 2025 година воведе мерки насочени кон Израел, меѓу кои забрана за увоз на производи од израелските населби, ембарго на оружје и забрана за влез на високи израелски функционери.

— реклама —

Новата влада на премиерот Јанез Јанша ги укина тие мерки, а самиот Јанша ја критикуваше политиката на претходната влада.

Голоб сега го обвинува својот наследник дека ја оддалечува Словенија од меѓународното право. Неговата партија најави дека во парламентот ќе покрене постапка за смена на Јанша и Кајзер.

До денес, дипломатските интереси на Израел во Словенија ги покриваше израелската амбасада во Виена.