Израелската армија денеска нареди евакуација на жителите од 20 градови и села во јужен Либан, откако од петокот навечер беа регистрирани повеќе напади со дронови врз северниот дел на Израел, за кои Тел Авив го обвини либанското движење Хезболах.
Портпаролот на израелската војска, Авихај Адраи, преку објава на арапски јазик на социјалната мрежа Икс ги повика жителите веднаш да ги напуштат своите домови и да се преселат северно од реката Захрани.
„Секој што се наоѓа во близина на борците на Хезболах, нивните објекти или складишта со оружје, го доведува во опасност сопствениот живот“, порача Адраи.
Засега не е познато колку лица се опфатени со наредбата за евакуација.
Претходно, израелската армија соопшти дека биле активирани повеќе предупредувања за воздушна опасност во северен Израел поради сомнежи за напади со дронови на Хезболах. Меѓу погодените подрачја биле и пограничните градови Метула и Мисгав Ам.
Иако примирјето меѓу Израел и либанската влада е во сила од април, Израел и Хезболах продолжуваат меѓусебно да се обвинуваат за негово прекршување. Израелските сили и натаму се распоредени во јужен Либан, каде што еднострано прогласија одредени области за „безбедносни зони“.
Хезболах, кој има поддршка од Иран, одбива да води преговори со Израел, а тензиите долж границата остануваат високи и покрај формалниот договор за прекин на огнот.
