Израел побара евакуација на либанскиот град Тир по заканите од Иран

Израелската армија (ИДФ) денеска издаде итен налог за евакуација на градот Тир во јужен Либан, предупредувајќи ги жителите веднаш да ги напуштат своите домови поради можни воени операции против Хезболах.

Наредбата се однесува и на жителите на христијанските населби и околните кампови, на кои им е препорачано да се евакуираат северно од реката Захрани.

— реклама —

Портпаролот на ИДФ за арапски јазик, Авихај Адраи, преку социјалната мрежа Икс порача дека присуството во близина на припадници на Хезболах ги загрозува животите на цивилите.

— реклама —

„Секоја зграда што Хезболах ја користи за воени цели може да стане цел“, предупреди тој.

Новото предупредување доаѓа само еден ден откако Иран соопшти дека ги прекинува нападите врз Израел, но истовремено се закани со „сериозен одговор“ доколку израелската војска продолжи со операциите во јужен Либан.

— реклама —

Во меѓувреме, либанската државна новинска агенција објави дека утринава имало артилериско гранатирање во околината на Мансури и Маџдал Зун, во областа Тир. Засега нема официјална потврда од израелската армија за овие информации.

Израелскиот премиер Бенјамин Нетанјаху изјави дека неговата земја „засега“ ќе се воздржи од нови напади врз Иран, но предупреди дека секој иден напад ќе биде проследен со силен одговор.

Во исто време, американскиот претседател Доналд Трамп ги повика Израел и Иран веднаш да ги прекинат непријателствата, наведувајќи дека мировните преговори се во завршна фаза и дека нивниот успех може да биде загрозен „само од незнаење или глупост“.