Израел тврди дека ликвидирал висок командант на Хамас во Газа

Израел соопшти дека во воздушен напад во Појасот Газа е убиен Мохамед Одех, новоименуван командант на бригадите „Ал Касам“, вооруженото крило на Хамас.

— реклама —

Во заедничко соопштение, израелскиот премиер Бенјамин Нетанјаху и министерот за одбрана Израел Кац навеле дека нападот бил извршен по нивна наредба.

Според израелските власти, Одех бил еден од организаторите на нападот врз Израел на 7 октомври 2023 година и во тој период бил шеф на разузнавачката служба на Хамас.

— реклама —

Израелскиот јавен сервис Кан, повикувајќи се на неименуван израелски функционер, објави дека Одех бил ликвидиран, додека телевизијата Канал 12, цитирајќи безбедносни извори, оцени дека операцијата била „успешно спроведена“.

— реклама —

Во соопштението се наведува и дека Одех бил одговорен за „убиства, киднапирања и ранувања на бројни израелски цивили и војници“.

Нетанјаху и Кац порачаа дека израелската армија и безбедносната служба Шин Бет ќе продолжат со операциите против сите одговорни за нападот од 7 октомври.

„Израел порано или подоцна ќе ги стигне сите извршители“, се наведува во пораката на израелските власти.