Израелската армија соопшти дека во текот на изминатата седмица извршила повеќе од 300 воздушни напади врз позиции на Хезболах во јужен Либан, во рамките на засилените воени операции што се одвиваат паралелно со пошироките тензии на Блискиот Исток.
Според Израелските одбранбени сили (ИДФ), биле погодени околу 310 цели поврзани со шиитската милитантна група, а во нападите биле убиени приближно 80 нејзини припадници.
Од израелската војска наведуваат дека воздушните удари биле координирани со дејствувањето на копнените сили долж линијата на фронтот, со цел уништување на воената инфраструктура на Хезболах и отстранување на заканите за израелските цивили и војници распоредени во пограничниот појас.
Израелското воено воздухопловство објави и видеоснимки од дел од операциите, за кои тврди дека прикажуваат напади врз објекти и позиции што ги користел Хезболах.
Судирите меѓу Израел и Хезболах траат речиси непрекинато од почетокот на март, кога либанската група започна напади врз израелски позиции во знак на поддршка за Иран. Во последните недели, израелските сили дополнително ги проширија операциите во јужен Либан и зазедоа нови подрачја во близина на границата, со цел воспоставување безбедносна тампон-зона.
Најголемата цена од конфликтот и натаму ја плаќа цивилното население. Според либанското Министерство за здравство, во досегашните судири загинале повеќе од 3.400 лица, додека над еден милион жители биле принудени да ги напуштат своите домови.
Од израелска страна, властите соопштуваат дека досега загинале најмалку 29 војници и тројца цивили.
Најновиот бран напади доаѓа во период кога се интензивираат дипломатските напори за намалување на тензиите меѓу Израел и Иран. Сепак, израелско-либанската граница останува едно од најопасните жаришта на Блискиот Исток и сериозна закана за регионалната стабилност.
