Израелската армија: Се подготвуваме за уште неколку дена борби со Иран

Израелската армија соопшти дека очекува борбите со Иран да продолжат најмалку уште неколку дена, нагласувајќи дека е подготвена и за подолготраен конфликт доколку дојде до понатамошна ескалација.

Според проценките на Израелските одбранбени сили (ИДФ), актуелните судири нема да завршат во краток рок, а војската останува во состојба на висока готовност.

— реклама —

Од ИДФ информираа дека Иран од синоќа кон Израел лансирал најмалку 20 балистички проектили. Според израелската армија, дел од нив биле пресретнати од противвоздушната одбрана, додека останатите паднале на ненаселени подрачја.

Во меѓувреме, јеменските Хути, кои имаат поддршка од Иран, утрово истрелале уште два балистички проектили кон Израел. Израелската војска соопшти дека еден од нив бил пресретнат, додека вториот не стигнал до израелска територија.

— реклама —

Како одговор на нападите, Израел досега извел два бранови воздушни операции на територијата на Иран.

— реклама —

Во текот на ноќта, десетици борбени авиони на израелските воздухопловни сили нападнале девет системи за противвоздушна одбрана во западниот и централниот дел на Иран. Дополнително, утрово биле погодени и три фабрики во петрохемиски комплекс во југозападниот дел на земјата.

Од ИДФ наведуваат дека нападите ги изведува исклучиво Израел, но истакнуваат дека постои целосна координација со Централната команда на САД (ЦЕНТКОМ). Американските сили, според израелската страна, учествувале и во пресретнувањето на дел од проектилите истрелани од Иран.

Израелската војска соопшти и дека началникот на Генералштабот, генерал-потполковник Ејал Замир, во текот на ноќта трипати разговарал со командантот на ЦЕНТКОМ, адмиралот Бред Купер, во рамки на координацијата меѓу двете армии.

Последните случувања дополнително ги зголемија стравувањата од поширока ескалација на конфликтот на Блискиот Исток, додека меѓународната заедница продолжува да повикува на воздржаност и дипломатско решение.