Израелската војска го затвори Хеброн по вооружен напад, Нетанјаху нареди дополнителни мерки

Двајца палестински напаѓачи отворија оган врз израелски воен контролен пункт во близина на Хеброн, на окупираниот Западен Брег, при што ранија петмина Израелци, од кои двајца се во критична состојба. Напаѓачите биле убиени во престрелка со израелските војници, која траела повеќе од 20 минути, објавија израелските медиуми.

Нападот се случил на раскрсницата Јудеја, на патот број 35, недалеку од Хеброн. Според првичните информации од истрагата на израелската армија, напаѓачите пристигнале со автомобил со израелски регистарски таблички, вооружени со автоматска пушка М16 и пиштол.

— реклама —

По отворањето оган се обиделе да побегнат, но биле убиени од припадници на израелскиот баталјон „Ари“, распореден во областа.

На снимките од местото на нападот се слушаат истрели и повици до војниците да побараат засолниште зад оклопно амбулантно возило. Еден од спасувачите предупредува дека поради непрекинатата престрелка не можат да ги извлечат повредените.

„Напаѓачот постојано пука. Размената на оган меѓу напаѓачите и нашите сили продолжува, не успеваме да ги извлечеме ранетите! Пукањето трае повеќе од 20 минути“, се слуша на снимката.

— реклама —

Според израелската служба за итна медицинска помош „Маген Давид Адом“, двајца од повредените се во критична состојба, двајца се здобиле со повреди од средна тежина, а еден е полесно повреден. Тие биле пренесени во болниците „Шаре Зедек“ и „Хадаса Еин Керем“ во Ерусалим.

По нападот, израелската војска вовела целосна блокада на Хеброн и ограничувања на движењето во околните палестински населби. Безбедносните сили започнале претреси, а во операцијата биле вклучени дополнителни воени и полициски единици.

— реклама —

Началникот на Генералштабот на израелската армија, Ејал Замир, одржал состанок со високи офицери на кој биле разгледани околностите на нападот и дополнителните безбедносни мерки. Тој одобрил подготовки за распоредување нови војници, како и засилување на разузнавачките активности и апсењата во областа.

„Ова беше тежок напад. Со брзата реакција, војниците спречија уште потежок напад и дополнителни жртви меѓу цивилите и припадниците на безбедносните сили“, изјавил Замир.

Според него, во автомобилот на напаѓачите била пронајдена поголема количина муниција, за која израелската армија се сомнева дека била наменета за напад од поголеми размери.

Израелскиот премиер Бенјамин Нетанјаху наредил итна блокада на Хеброн и подготовки за целосна блокада на окупираниот Западен Брег, пренесува „Асошиејтед прес“.

По нападот, Нетанјаху одржал итен состанок со безбедносниот кабинет, додека израелските сили ја засилиле контролата на движењето во палестинските населби.