Израелскиот министер за финансии Безалел Смотрич остро го критикуваше рамковниот мировен договор меѓу САД и Иран, оценувајќи дека тој е „лош за Израел“ и „за целиот слободен свет“.
Во објава на социјалната мрежа Икс, Смотрич порача дека досегашната кампања против Иран не смее да заврши и дека Израел ќе мора самостојно да продолжи да дејствува против иранското раководство.
„Заедничката кампања имаше многу достигнувања во слабеењето на Иран и тие нема да бидат залудни. Ќе мора да ја продолжиме кампањата сами, и на креативни начини, да го собориме режимот и да обезбедиме Иран никогаш да не добие нуклеарно оружје“, напиша Смотрич.
Тој додаде дека актуелното израелско раководство се соочува со сериозни притисоци и изрази поддршка за премиерот Бенјамин Нетанјаху.
„Ниту еден од кандидатите кои се сметаат за способни за премиерската функција не би издржал ниту десет проценти од притисокот што во моментов се врши врз израелската влада, а особено врз нејзиниот лидер“, наведе министерот.
Осврнувајќи се на ситуацијата во Либан, Смотрич оцени дека Израел допрва ќе биде ставен на тест.
„Во Либан ќе бидеме тестирани. Ова е наша војна, наши борци и непосредна безбедност на жителите на северот. Ќе продолжам да дејствувам за да останеме цврсти на нашите позиции и да му овозможиме на ИДФ целосна слобода на дејствување во понатамошното потиснување на Хезболах“, порача тој.
Изјавата на Смотрич доаѓа во период кога дел од израелските функционери и провладини коментатори отворено го изразуваат своето незадоволство од најавениот договор меѓу Вашингтон и Техеран, оценувајќи дека тој не ги гарантира безбедносните интереси на Израел.
