Израелскиот претседател го помилува поранешниот војник осуден за пукање во ранет Палестинец

Израелскиот претседател Исак Херцог го помилува поранешниот војник Елор Азарија, кој во 2017 година беше осуден поради тоа што во Хеброн застрелал тешко ранет Палестинец. Со одлуката, на Азарија веднаш му е избришана казнената евиденција, шест години пред рокот во кој тоа би се случило автоматски според законот.

Канцеларијата на Херцог нагласи дека помилувањето не ја поништува пресудата и не претставува повторно разгледување на случајот. При донесувањето на одлуката биле земени предвид времето што поминало од настанот, фактот дека Азарија ја издржал казната, неговите семејни околности и тешкотиите со кои се соочувал при вработување поради казнената евиденција.

— реклама —

Случајот, кој предизвика поделби во израелската јавност, се случил во март 2016 година во Хеброн. Абдел Фатах ал-Шариф и уште еден Палестинец со нож нападнале израелски војник. Израелските војници пукале кон напаѓачите, при што ал-Шариф бил тешко ранет и останал неподвижен на земја.

Околу 11 минути подоцна, Азарија, кој тогаш бил воен медицински техничар, му пришол и пукал во главата. Настанот бил снимен со мобилен телефон.

— реклама —

Воениот суд во 2017 година го прогласил Азарија за виновен за убиство без предумисла и му изрекол затворска казна од 18 месеци. Подоцна казната била намалена на 14 месеци, а Азарија бил ослободен во 2018 година, откако издржал девет месеци затвор.

Помилувањето го поддржал министерот за одбрана Израел Кац, по чија препорака Херцог ја донел одлуката. Против помилувањето бил началникот на Генералштабот на израелската армија, Ејал Замир.

— реклама —

Од кабинетот на Херцог соопштиле дека Азарија во барањето за помилување изразил жалење поради последиците од настанот. Во претходно барање тој пукањето го опишал како „оперативна грешка“.

Замир, пак, претходно изјавил дека Азарија не покажал каење и не презел одговорност за своите постапки.

Одлуката за помилување е донесена во пресрет на Јом Кипур, еврејскиот Ден на помирувањето, што кабинетот на Херцог исто така го навел како една од околностите земени предвид.

Азарија и членовите на неговото потесно семејство од 2024 година имаат забрана за влез во Соединетите Американски Држави. Тогашната американска администрација соопшти дека Азарија е одговорен за сериозно кршење на човековите права на Западниот Брег.