Ја претепал до бесвест, па ја оставил пред маркет: Нови сознанија за насилството во Охрид

Девојка од Охрид била брутално претепана речиси до бесвест, по што, според неофицијални информации, била исфрлена од автомобил и оставена на улица пред маркет. Таа била пронајдена со видливи повреди и итно пренесена во болница, каде што била хоспитализирана и задржана на лекување.

Според досегашните неофицијални сознанија, девојката претходно била во ресторан со нејзиното момче, каде што започнала расправија. По заминувањето од ресторанот, расправијата наводно продолжила во автомобилот, каде што девојката била физички нападната сè додека не изгубила свест.

— реклама —

Потоа, според истите информации, била оставена на улица пред маркет, во тешка состојба.

Неофицијално, по инцидентот во полициска станица бил задржан и таткото на нападнатата девојка, наводно поради физичка пресметка со лицето осомничено за нападот врз неговата ќерка. Според овие сознанија, тој ќе биде задржан 24 часа. Оваа информација засега нема официјална потврда од полицијата.

— реклама —

Како што претходно објавивме, полициски службеници од СВР Охрид на 15 ноември, во 5:05 часот, го лишиле од слобода Х.К. (31) од Охрид, по пријава дека физички ја нападнал својата девојка.

— реклама —

Од Основното јавно обвинителство Охрид претходно информираа дека кривичната пријава сè уште не била доставена до обвинителството, а известувањата што ги добиле не содржеле наводи за дел од потешките околности за кои прашуваат новинарите.

За осомничениот засега е поведена постапка за кривично дело „телесна повреда“ од член 130 став 2 од Кривичниот законик.

— реклама —

Обвинителството посочи дека постапува за целосно расветлување на настанот.

Останува надлежните институции да утврдат како точно се случил нападот, каква е тежината на повредите и дали новите сознанија ќе влијаат врз правната квалификација на делото.