Тешка несреќа се случила на плажа во Ханија на Крит, откако 45-годишен маж при игра со својата мала внука се здобил со сериозна повреда на вратот.
Според грчките медиуми, мажот го ставил девојчето на рамениците и сакал да ѝ помогне да скокне во морето. Во еден момент, девојчето ја загубило рамнотежата и паднало со голема сила директно врз неговиот врат.
Од ударот 45-годишникот паднал во водата, при што се здобил со скршеница на вратен пршлен, со зафатеност и на ’рбетниот мозок. Тој веднаш бил пренесен во болница во Ханија, а поради сериозноста на повредата бил итно префрлен во болницата „Венизелио“ во Ираклион.
Лекарите процениле дека е неопходна итна операција, а за интервенцијата од Атина бил обезбеден специјален имплант. 45-годишникот бил опериран од тим неврохирурзи, кои се обидуваат да ги ограничат последиците од повредата и да ги зачуваат шансите за враќање на подвижноста.
По операцијата првично биле забележани охрабрувачки знаци, бидејќи мажот успеал да ги движи рацете. Сепак, неговата подвижност подоцна повторно се намалила, поради што лекарите внимателно ја следат неговата состојба.
Медицинскиот тим и понатаму е умерено оптимистичен дека може да дојде до значително подобрување. Следниот период ќе биде клучен за утврдување на степенот на оштетувањето и можностите за понатамошно закрепнување.
