Јаков Јозиновиќ се огласи по бурните реакции за песната на Томпсон: „Јас сум музичар, а не политичар“

„Јас сум музичар, а не политичар“, порача Јаков Јозиновиќ откако во јавноста се појавија реакции поради снимка на која ја пее песната на хрватскиот пејач Марко Перковиќ Томпсон. Младиот пејач објасни дека видеото е старо речиси две години и е снимено на почетокот на неговата музичка кариера, кога имал 19 години.

Во објава на Инстаграм, Јозиновиќ истакна дека никогаш не ја гледал музиката низ призмата на националноста, религијата или бојата на кожата и дека немал намера да навреди некого со своите настапи.

— реклама —

„Интересно е како едно видео од почетокот на мојата кариера станува причина за бројни толкувања и навреди. Затоа чувствувам потреба да проговорам, за јасно да кажам што сметам за важно“, напиша пејачот.

Тој додаде дека е свесен оти музиката во регионот може да носи болни историски и лични значења, но нагласи дека почитта кон сопствениот народ не подразбира непочитување на другите.

— реклама —

Јозиновиќ се осврна и на изјавите што, како што тврди, му се припишуваат во медиумите, а никогаш не ги дал. Тој ги осуди, како што ги нарече, невистините и обидите неговото име да се користи за создавање конфликти.

„Не се согласувам да бидам дел од медиумски манипулации и невистини, ниту да дозволам моето име да се користи за создавање конфликт таму каде што не му е местото. Јас сум музичар, а не политичар“, порача тој.

— реклама —

Пејачот најави дека ова е неговото единствено обраќање на темата, додавајќи дека сака да изгради кариера во која музиката ќе биде начин за пренесување емоции и поврзување на луѓето низ регионот.

„Останувам истото момче за кое музиката беше и останува начин да пренесе емоции, да ги поврзе луѓето и да ги допре нивните срца“, напиша Јозиновиќ, заблагодарувајќи им се на обожавателите за поддршката.

За снимката претходно се огласи и пејачката Милица Тодоровиќ, која застана во негова одбрана по иницијативата за забрана на неговиот влез во Србија.

„Зошто би му било забрането да влезе, не разбирам. Пееше хрватска песна, човекот е Хрват“, изјави Тодоровиќ, додавајќи дека не гледа причина за такво барање.